Kuehe 30 jasypoapy 2024-pe ojejapo Itapúape Amandaje Guarani rehegua. Aty oñepyrũ pyhareve 7:30 aravópe ha ojepyso 11:30 aravo peve. Upépe oñeñe’ẽ mba’éichapa oĩhína ñe’ẽ Guarani ko’ág̃a rupi ñane retãme rehe. Ko amandaje ojerojera Rohayhu Che Ñe’ẽ ryepýpe, osako’íva Guarani Ñe’ẽ Angirũ Ñanduti, Mbo’ehararã Tekombo’e Centro Regional-pegua ha Tetã Mbo’ehaovusu Itapuapegua ndive 30 jasypoapýpe.
Ñepyrũrãme oñe’ẽ Mg. Rita Madrazo oisãmbyhýva Instituto de Formación Docente, Centro Regional de Educación de Encarnación-pegua omyesakãvo mba’érepa ojejapoha atyguasu.
Upéi oñe’ẽ Estela Trinidad, Guarani Angirũ Atygua ha avei Consejo Distrital de Educación-gua. Hapykuérema omomaitei avei omyakãva Universidad Nacional de Itapúa.
Ñe’ẽhára peteĩha, Grayson Toliver, ñe’ẽkuaatyhára EEUU-ygua oñe’ẽ Guarani ñe’ẽ jeporu arareíre opa hendápe rehe, ojehechaháicha mombyry guive.
Uperire oñepyrũ Ñemongetajovái Peteĩha «Guarani Ñe’ẽ mbo’ehaokotypegua» rehegua. Upépe tembikuaajára Miguel Ángel Verón, Instituto Yvy Marae’ỹ omyakãva, oñe’ẽ tekombo’e ryepypegua rehe. Mbo’erekokuaahára Sintia Ortiz, omyakãva IFD Capitán Miranda ha ombo’éva Facultad de Humanidades-pe, oñe’ẽ tekombo’e mbo’ehao ryepypeguáre. Upéi oñe’ẽ Tembikuaajára Dionisio Fleitas, AUGM-pegua ha Eva Ríos, Departamento de Idiomas UNNE-pegua.
Pytu’u mbyky rire oñepyrũ Ñemongetajovái Mokõiha «Guarani ñe’ẽ jerereko tetã ñe’ẽnguéra ñembohape ryepýpe». Upépe oñe’ẽ Mauro Lugo, Guarani Ñe’ẽ Rerekuapavã omyakãva. Oñe’ẽ avei Celia Godoy, Ñe’ẽnguéra Rape’apo Moakãhára ha avei Julia Rivas, Tekombo’e Pytyvõha Itapuapegua rérape.
Ombo’apu’a amandaje Karai Javier Viveros, Paraguái Ñe’ẽnguéra Sãmbyhyhára, ha oñe’ẽ moõ gotyópa jaha ñe’ẽnguéra ñembohapére Paraguáipe.
